Indonesia Ratifika ASEAN agreement on Transboundary Haze Pollution.

Ratifikasaun DPR Indonesia kona-ba

ASEAN agreement on Transboundary Haze Pollution.

Update Info: Celso Fonseca

Membru ASEAN ne’ebe durante ne’e preukupa makas ho polusaun ar ne’ebe mai husi nasaun Indonesia ne’ebe tinan-tinan sempre mosu ahi han rai, (kebakaran hutan) iha area florestal Sumatra ne’ebe sai emasa boot ba Haze Polusaun Transfronteira, ida ne’e afeita polusaun ar no fo impaktu negativu ba ambiente nasaun vijinu Malaysia, Singapura, no Brunei.

Maske membru ASEAN ho respeitu tomak tuir tradisaun no prinsipiu deklarasaun ASEAN hodi halo intervensaun dialogu, negosiasaun diplomatiku ho maneira oi-oin atu fo presaun ba governu Indonesia hodi kontrola polusaun ar husi aktividade sunu rai (ai) ne’ebe sai preukupusan ba membru husi nasaun Singapura no Malaysia ne’ebe sira simu direitamentu kausa polusaun ar husi Sumatra tanba area ne’e besik liu sira nia nasaun.

Ohin sai istoria foun ba membru ASEAN tanba iha ona komitmentu no aksaun legal husi governu Indonesia hodi ratifika akodu “ASEAN agreement on Transboundary Haze Pollution”  ne’ebe parlementu nasional (Dewan Perwakilan Rakyat) Indonesia ratifika ona horseik iha dia 16 de Setembro 2014. Ratifikasaun ba akordu ida ne’e lori tenpo naruk duni, nasaun membru ASEAN sira ratifika ona iha tinan 2002 iha Kuala Lumpur no Indonesia mak lori tenpo naruk durante tinan 12 nia laran to fin ohin loron sira pronto no ratifika akordu ASEAN agreement on Transboundary Haze Pollution.

Objektivu “Asean agreement on Transboundary Haze Pollution”  tuir artikel numeru 2 mak atu        “prevene no halo monitorizasaun ba Haze Polusaun Transfronteira (transboundary haze     pollution) ne’ebe resulta husi sunu rai, ou ai ne’ebe preija halo mitigajaun liu husi esforsu        konsentradu nasional, intesifika koperasaun rejional no internasional. Ida ne’e sei atinji no to’o iha konteksu dezenvolvimentu sustentavel tuir padraun no provijaun iha akordu ne’e.”

Tuir Ministru meu Ambiente Indoensia nian katak “ratifikasaun ba Asean agreement on Transboundary Haze Pollution nudar pasu ida ne’ebe hatudu komitmentu no seriedade Estadu Indonesia hodi toma atensaun no halo asaun konkritu hodi prevene polusaun ar ba membru ASEAN sira seluk liu husi kontrolu makas ba sunu rai no ai laran”

·         #### Hau pesoalmentu apresia komitmentu no asaun Governu Indonesia hodi ratifika ona akordu regional Asean agreement on Transboundary Haze Pollution maibe mosu preukupasaun bo’ot se wanhira Governu Indonesia la fo atensaun makas ba prevensaun atividade illegal husi sunu ai/rai no asaun legalidade law enforcement ne’ebe forti atu kondena makas ba ema, kompanha nebe buka lukru (tesi no fan ai) no grupo sira ne’ebe halo aktividades sunu rai/ailaran.

·         ####Presija mos servisu kordenasaun regional husi membru ASEAN sira atu oinsa hanoin hamutuk no halo intervensaun sedu ba prevensaun polusaun ar husi aktividade illegal sunu ai/rai iha area florestal iha Sumatra, kalimatan no seluk tan.

·         #####Governu Indonesia tenki aloka makas orsamentu hodi halo intervensaun prevensaun direitamente no halo peskija klean kona ba prevensaun, asaun altenativa husi esforsu sira ne’ebe durante ne’e halo bebeik maibe failha nafatin no mosu bebeik aktividade illegal sunu rai/ai laran.

· *******Espera que liu husi ratifikasaun akordu ne’e bele lori istoria foun ba nasaun Indonesia ho komitmentu ba kontibusaun konservasaun ambiente.****

http://www.asean.org/archive/images/agr_haze.pdf

http://www.antaranews.com/en/news/95683/indonesia-ratifies-asean-agreement-on-transboundary-haze pollution

Responde Komentariu kona-ba : Koperasaun Governu Chinez ho Timor-Leste no Investimentu iha setor Oi-oin

Responde Komentariu kona-ba

Koperasaun Governu Chinez ho Timor-Leste no Investimentu iha setor Oi-oin

http://forum-relasaun-internasional.blogspot.com/2014/04/koperasaun-governu-chinez-ho-timor.html

                “China nia politika "luar-biasa"---investe iha TL no osan fila ba sira nia rai. TL simu deit konstrusaun  fiziku duke             investe ba kapasidade trabalhadores Timor-oan. Ida ne'e mak dezenvolvimentu ka? Se ema Timor-oan sai          "penonton" deit?” (Komentariu husi Kaisala Ara)

                Hau Hanoin Relasaun Entre Xina Ne'e Di'ak No Presiza Hadi'ak Liutan, Hanesan Ita Hotu Hatene    Katak     Relasoens TL-               Xina Iha Kontekstu Ekonomia Di'ak Liu Mak Ajudu Ka Sasan Ou Investimentu   Ne'ebe  Mai TL .

                Ne'e Ho Meodelu Material Labele Sira Nian Emar Mak Mai, Tanba Ne'e TL Presiza  Haree Lei Kona-Ba                             Sidadania, Tanba Sei Loke Dalan Ba Sira Sai Nain Ba Rai, Sira Mos Bele Hetan Projeitu Nasional... Maluk Sira Haree          To'ok...(Komentariu husi Amushu Shukoka)..............>>>>

Responde komentariu iha :https://www.facebook.com/groups/196221343897779/

Hau konkorda ho kolega Kaisala Ara ho Amushu Shukoka. Politika China “luar biasa” ne’e lós, no realiade akontese la’os iha Timor-Leste deit maibe mos akontese iha AFRIKA no nasaun ki’iak sira iha mundo. Politika China ba nasaun ki’ak sira sai hanesan “makan buah simalakama” tanba ita presija sira maski iha ita nia laran lakoi sira mai iha ne’e, maibe sira nia presensa minimal fa’an sasan bajakan balun atu ita nia ema sira ho ekonomia ki’ik bele sosa salae ita sai penontong la bele sosa eleoktonika sira seluk ne’ebe karun liu, ita hare ema komesa uja Mp3, camera, HP didiak made in china, minimal nikmati oituan lah, maski ema bolu dehan barang China murahan,,, hehheh

 Ema China sira mai iha TL barak duni, e ita hare’e, maioria iha kapital Dili no balun ba distritu sira iha Timor laran, ema barak kestiona sira nia presensa sai ameasa bo’ot ba ita nia empresariu ki’ik sira.  Iha komentariu barak dehan katak ita sei sai “bainaka” ba ita nia rai! Lossss....klaru, ita sei sai bainaka no sai bainaka nafatin, tanba ba sa hau dehan hanesan ne’e, laos kestaun tanba presensa China deit iha Timor-Leste maibe aban bain rua ita sei tama membru ASEAN, automatikamentu ita mos tama komunidade ekonomia ASEAN-AFTA (ASEAN Free Trade Area) nudar pilares tolu ne’ebé sai parte integral ba visaun no misaun  ASEAN. Ida ne’e sei sai pior liu tan, tanba sei iha movimentu kapital mai Timor-Leste, liu husi investimentu no buat oi-oin deit, ida ne’e mak lalaok free trade nian,  terminolojia globalizasaun nian, mundu ne’ebe laiha ona impedimentus ba komersiu nian, mundu ne’ebé nakloke nia-an ba mundu seluk, mundu ne’ebé sei halo interkoneksaun iha parte ekonomia,  sosial, kultura no seluk tan.

Kolia kona ba investimentu, Iha Dili, agora dadauk ita hare Timor-Telkom investe iha ne’e lori ona mos sira nia ema peritus sira balun, no tekniku sira mai iha Timor-Leste, TELKOMCEL mos hanesan lori sira nia peritus sira, Telemor mos halo hanesan,  laos ida ne’e deit, halo projetu bo’ot ita tenki importa ema sira husi rai liur, halo ponte komoro deit ema stranjeitu nain hira mak tenki servisu iha ne’eba. Monta linha, fiu eletrisidade liga ba  distritu tenki uja ema sira husi liur (ita uja tekniku China sira no husi Indoensia). Ita labele fo kulpa ba inta nia empresariu lokal tanba sira mos hakarak ema tekniku profesional sira para halo obra ne’e ho diak, no hetan profit ruma, no ita labele impede ne’e sira nia decisaun.

Se aban bain rua ita tama ASEAN ita sei hasoru nasaun membru sira, nasaun 10 ne’ebe mak sei mai investe iha ne’e,  no laos membru sira deit maibe mos iha koperasaun inter rejional ou entre ASEAN ho nasaun seluk, hanesan ASEAN-Free trade area ho Korea du Sul, Ho China, nos nasaun seluk tan, nasaun sira ne’e posibilidade sei lori nia ema mai iha ne’e.  Ida ne’e aumenta tan ita nia ema sai “penontong luar biasa”. Sei ita lokoi servisu ba sira, tamba ita lakoi sai bainaka. Ou ita lakoi prepara didiak iha parte labor skill nian.

Hau foti ezemplo deit, investimentu iha parte hospitalidad nian, tuir hau nia hare’e no observasaun problema ba ita ita nia ema mak, etika servisu, etika komunikasi, kompanha sira ne’ebé eziste iha ita nia rai prefere liu maluk sira balun mai husi rai liur (liu-liu iha ba posisaun supervisors ou manajer) duke ita nia ema tanba la hatudu vontade diak, haruka servisu oras 8 maibe iha tenpo servisu gasta oras sorin balun hodi konta storia, gosip, no oi-oin informsau ida ne’e hakerek nain hetan husi empresariu sira no supervisor sira. 

Ezemplu balun, bainaka husu ou order hahan ruma, sira mai ho lian kasar, ou deskute tan ho bainaka hehhehe ne’e ezempu deit laos ema hotu-hotu (governu presija halo intervensaun hodi hadia area ida ne’e). Ida mak ne’e ezemplo saida mak akontese agora. Belajarlah dari orang China, ita mos presija foti  esperensia etika sevisu Chinez sira nian, oinsa sira halo servisu, foti buat sira positivu husi sira. Labele kritika deit maibe minimal foti asuntu positivu ne’ebe mak ita bele aprende!!!!

Kolia kona ba lalaok komersiu,  ema sempre buka meius oinsa para hetan profit, ita hare iha fatores oinsa atrai investor sira, tanba sa mak iha investimentu tanba sa mak ema barak hakarak investe iha rai balun duke iha ita nia rai hanesan ambiente Foreign Direct Investment iha China, Vietnam Indoensia, Thailand buras tebes nomos nasaun seluk duke iha ita nia rai?  Tanba iha investor sira mos hare husi aspeitu hirak ne’e, iha rekursu humanu ne’ebe ho skil bo’ot maibe iha etika servisu diak, profesional, entaun investor sira hili nasaun sira ne’ebé iha rekursu ne’ebé iha duke sira mai investe iha Timor-Leste.

Ita hare momos, iha enkontru dala barak, enkontru parserial husi doadores internasional no nasaun ki’iak sira hanesan Timor-Leste no nasaun seluk, sira nia hakarak mak investimentu, iha Timor-Leste investimentu sai asuntu importante oinsa ita hakarak atrai investor sira mia iha ne’e, agora dadauk fator prisipal mak hadia ita nia estabilidad nasional pare bele aseugra ambiente investimentu iha ita nia rai, nune’e mos iha rejiaun seluk, liu-liu Afrika, investimentu sai asuntu importante, lider Afika sira sempre hato’o kestaun ba doadores sira liu-liu membru OECD, organizasaun ekonomia internasiona, NGO Internasional sira katak sira la’os deit presija International Aid (developmental Aid) maibe sira presija investimentu. Sira kontinua hakilar investimentu, la’os simu osan deit (Tuir peskiza husi Dambisa Mayo katak Afrika sai nasaun ne’ebe hetan desaste tamba proble “aid”  maibe tanba sa mak doadores sira kontinua nafatin sirkula osan ba sira?)  sira hatene osan sira ne’e fakar barak iha sira nia rai, resultadu zero,  hanesan mos iha TL “8 Billion already spent on Timor-Leste  not in Timor-Leste” fantastatik liu. Osan sira ne’e ba ne’ebe, se mak han, povu ki’ik, mak han ka? Husu tok sira se’e ida ne’e los? Ou advisor sira? Ou governu, husu tok sira? Ou keta INGO-NGO sira, hau lahatene, husu tok sira?

Ita hare nasaun bo’ot  hanesan USA, Australia ema sempre gaba sira, saida mak sira halo ona ba nasaun sira iha pasifik, saida mak sira halo ba Timor-Leste, politika foer mak barak ya kan,!!!! foin dadauk Australia halo ema barak mak tensaun sae, tanba politika foer ne’eb”e bobar metin ho sira stratejia ekonomia politika liu husi sira nia ajuda, “trojan aid”  “ajudus boa vontade” liu husi ajuda oi-oin hanesan lidera  INTERFET mai Timor-Lste, liu husi ajudus humanitarian nian-AUSAID, no ajudus humanitarian seluk maibe iha parte balun konsikuensia ita lakon ho ita rikun soin balun “kazu” espionajen, no akordu kona ba mina nian ne’e sira hetan profit bo’ot.

Kolia kona-ba USA, tanba sa mak sira  hakarak hakbesik mai Dili? Iha hau nia artikel anterior hau hatete katak sira komesa preukupa presensa China iha Dili, sira tauk keta China mai domina iha Timor-Leste : Politika estranjeiro USA kona-ba visita Hillary Clinton mai Dili tinan hirak liu ba ne’e hatudu mai ita katak sira buka hela pendekatan ho Timor-Leste, buka mos naran, (MPO-mencari perhatianOrang, governu TL), ida refere ba preukupasaun China iha rejiaun Asia Sudeste, no pasifiku, liu-liu hare husi geo-strategi politika, Timor-Leste sai ponte stratejia  ba rejiaun pasifik no Asia Sudeste.

Liga ba investimentu, hau fiar, katak sei laiha investimentu husi nasaun bo’ot sira hanesan ne’e, se iha mos tanba sira hakarak mai halo investe iha area espesifiku hanesan enerjia no seluk tan. Hare’e rek tok, invenstor husi nasaun rua ne’e, se mak mai iha Dili halo investimentu, Cocacola, Intel, Apple,  no seluk tan sira halo ona ihane’e ka lae? Karik tinan oin, sekulu oin mai? Ita hein deit.

Tanba sa mak sira la mai investe iha Dili? Iha rajaun oin-oin, permeiru no prinsipal mak kestaun siguransa nasional, maibe la’os ne’e deit iha asuntu barak mak sira kestiona, karik sira hare ita nia rekursu humanu liu-liu labor skill, hospitality, birokrasia, korupsaun no seluk tan. Se ita la muda ita nia mentalidade, etika profesionalismu, no seluk tan entaun ita mak sei tane liman hakilar nafatin ba mundu sira seluk atu ema sira ne’e mai investe iha ita nia rai. Se hanesan ne’e, ita iha osan oitua, tanba sa mak ita nia governu la suporta empresariu ki’ik sira atu investe duke tane lian nafatin? Nee kesataun seluk ne’ebe ita presija hare’e.

Atu hanoin oinsa bele resolve problema hirak ne’e depende ba esforsu husi parte state actors and non state actors (liu-liu papel jerasaun foun, estudante)  sira presija servisu maka’as liu tan fo kontribusaun ba nasaun ida ne’e liu husi maneira no estrategia ekonomia politika oi-oin atu hadia, dezenvolve, ita nia rai.

Thanks ba kolega sira nia komentariu.

Artikel ida ne’e ho objetivu atu resposta ba komentariu sira iha Facebook, laos atu defende hau nia ideia (narsis), ou pro-ba nasaun China, maibe liu husi artikel ne'e ita bele hare fila fali, refleta fila fali katak tenpo agora oportunidade di'ak ba ita atu aprende, estuda barak liutan no halo komparasaun saida mak akontese iha ita nia rai, iha tenpo pasadu, presente no iha futuru oin mai, maski iha gap barak. Ba kolega jerasaun foun, estudantes sira, ida ne'e tenpo diak ba ita atu prepara-an didiak molok atu hakat ba oin, hasoru desafius, impedimentus bo'ot, liu-liu atu troka jerasaun tuan sira.

Sempre tau iha ita nia ulun, politika iha ambiente internasional la'o ho maneira oi-oin, anarkis, no pragmatis, ohin bele lao harmonis, sai amigu maibe loron ikus bele sai inimigu, ida inimigu sai amigu, politika ne'ebe realistiku. ita tenki hatene ambiente dinamika sira ne'e no oinsa atu survive, no labele sai "PENONTON SETIA ATAU PENONTON SEJATI"  ita mos bele sai PLAYER, iha ambiente dinamika politika internasional. Hanesan ita nia nai ulun balun halo dadauk iha nasaun Afrika, no nasaun seluk, ne'e ezemplo di'ak katak Timor iha potensia nudar aktor estadu iha ambiente politika internasional.

Se liafuan balun la kona imi nia laran bele halo komentariu iha FB ou blog : Forum Relasaun Internasional.

Celso da Fonseca:  Administrator Forum Relasaun Internasional.

Papel Estudante Relasaun Intenasional núdar agensia Transformador ba Dezenvolvimentu sosial no Ambiente Hanoin Kreativu.

“Artikel ida ne’e hakerek nain dedika ba kolega sira ne’ebe iha departementu Relasaun Internasional UNTL no UNITAL, liu-liu ba kolega sira ne’ebé mak foin hahú sira nia estudu iha Aula Relasaun Internasional”

Benvindo ba kolega sira hotu.

Papel estudante iha prosesu dezenvolvimentu nasional Timor-Leste sai aspeitu krusial hodi fo kontribusaun matenek, siencia ne’ebé aprende durante iha ambiente akademia bele utiliza no suporta ema idak-idak nia moris ba kondicoens ne’ebé diak liu tan, liu-liu bele fo kontribusaun ba transformasaun dezenvolvimentu sosial povu Timor-Leste.

Molok atu tama Universidade, ema idak-idak iha ona planu, hanoin, mehi no ambisaun, atu ba ne’ebé? Atu sai ema oinsa? Perguntas ne’ebé importante mak oinsa matenek hirak ne’e bele fo benefisiu ou konstribusaun hodi hadia no dezenvolve ema ida-idak nia-an, familia, komunidade no nasaun? Certamente perguntas hirak ne’e klaru, ema barak sempre hanoin hanesan ne’e, maibe dala barak ita haluha buat hirak ne’e?

Ema da-idak iha hanoin no interpretasaun oin seluk, simplesmente ita bele konklui katak alunus universitariu sira presija eskola para sai ema ne’ebé edukadu, literadu, atu hasa’e ita nia status sosial, no bele hetan servisu diak wanhira iha gelar bo’ot (Sarjana, Masteradu, Doutor(S3) para bele hetan posizaun didiak ho karier bo’ot. Rajaun barak, ema ida-idak hanoin no planu oin seluk. Hanesan artikel ne’ebé hau publika iha semana ida liu ba kona ba “esperensia” núdar estudiosu Reasaun Internasional.

Artikel ida ne’e elabora husi esperensia, kondicoens sosical Timor-Leste no komparasaun analiza papel estudante ba dezenvolvimentu nasional liu husi terminologia ambiente kreativu.

Nasaun ne’ebé lala’ok dezenvolvimentu foin nafunan no foin sai husi ambiente konflitu ba nation building no state building, iha desafius oioin nebe ita infrenta. Preukupasaun bo’ot ne’ebé estadu infrenta mak problema sosial, hanesan populasaun infrenta asesu ba be’e mos, eletricidade, laiha klinika ou hopital ne’ebé ho aimoruk adekuadu, escola do’ok husi uma, kondisaun eskola ladiak, estrada a’at, pior liu iha fatin balun laiha hahan ne’ebé adequadu tanba problema kondisaun ambiente la favoravel atu kuda aihan no buat seluk.

Kondisaun hirak ne’e sai preukupasaun bo’ot, ida mak hanaran moras sosial, ne’e mak pobreza ne’ebé ita infrenta. Pobreza sai ameasa bo’ot ba nasaun, ba povu no ba decision maker sira (governu de facto), internvensaun saida mak sira halo agora seidauk bele fo resultadu positivu. Membru governu, sociedade civil, agensia internasional doadores internacional esfonsu an liu husi internvensaun programa oin-oin ne’ebé ita asiste dadauk.

Kolia kona-ba ajensia internasional, por ezemplo agensia Korea KOICA, fo ajuda finasial no kapasitasaun ba governu iha area Naval, fo ajuda ba populsaun Hera ho be’e mos ne’ebé uza teknologia foun utilija tasi be’en, ajuda osan lubuk balun ba area edukasaun primaria, nomos fo kapasitasaun ba governu liu husi tarining program hanesan dadauk iha 214 pesoas ne’ebé hetan ona kapasitasaun short training minimal semana ida to’o fulan 1 iha Korea dul Soul, no Masteradu kuaje 10 pesoas ne’ebé akaba ona estudu iha universidade sira iha Korea.

Laos KOICA deit mak fo tulun, maibe kuaje membru OECD (Organization of Economic Cooperation Development) liu husi sira nia agensia dezenvolvimentu internasional hanesan JICA, USAID, AUSAID, GTZ, no agensia Internasional sira seluk, nomos NGO Internasional no NGO lokal sira.

Kapasitasaun barak ne’ebé Timor oan hetan, no intervensaun asistensia teknika, no ajudu humanitarian hirak ne’ebé husi organizasaun hira ne’e liu-liu iha area kapasitasaun dezenvolvimentu rekursu humanu barak tebes ona, no sira ne’e iha papel kontribusaun bo’ot ba estadu Timor-Leste.

Relasiona ho rekursu humanu Timor oan, tuir hakerek nain nia observasaun, iha Timor-Leste, matenek barak los ona, balun ho titulu, S1, S2 double, no S3 e balun hetan esperensia servisu barak liu no balun sai asesor, balun sai konsultant no staf profesional iha area oin-oin. Diversidade potensia hirak ne’e sai rekursu visivel ne’ebé bele fo kontribusaun ba nasaun ida ne’e. Hare ba kondisaun potensia rekursu humanu ne’ebé ita iha, bele hatudu katak nasaun ida ne’e prontu ona atu kaer kuda talin rasik, suporta dezenvolvimentu nasional iha area oin-oin.

Kompara ba kondisaun realidade liga ba rekursu humanu ne’ebé ita iha mehi katak sira bele fo kontribusaun ba dezenvolvimentu nasional, mosu hanoin skeptismu wanhira ita hare kondisaun realidade iha Timor-Leste katak rekursu hirak ne’eb’e ita iha seidauk bele fo kontribusaunbo’ot ba ema vulneravel sira, liu-liu ita hare ema kia’ak aumenta ba bebeik, la reduz, maske ita hatene katak Ministeriu Finansa hasai dadus kona ba kondisaun pobreza hatudu ho reportajen katak ema ki’ak reduz ona husi 49 percentu ba 45 percentu, no numeru mortalidade labarik no inan redus ona, Timor-Leste halo progresu diak ba area saude nian.

Ho hanoin badak, la presija uja naliza ho dadus statistiku, ita dala barak rona husi media, TVTL, povu barak mak sei halerik hela tanba problema konvensional ne’ebé sira infrenta hanesan asesu ba be’e mos iha distritu sira laiha, (hare ezemplo indikador iha Dili deit tenpo bai loron ema la’o tun sae lalin be’e, oinsa ho distritu). Hahan laiha, uma hetan estragus husi impaktu desatre naturais, no buat seluk tan.

Ho kondisaun social hanesan ne’e fo perguntas bo’ot ida ba ita núdar estudante relasaun internasional saida mak ita presija prepara hodi fo kontribusaun ba trasformasaun dezenvolvimentu sosial? Importante ba ita mak hanesan buat hirak tuir mai ne’e:

1.      Liu husi sistema edukasaun formal (universidade) ita presija aprende teoria, estudo komparasaun no hare oinsa paradigma hanoin akademia bele implementa iha terenu.

2.      Liu husi universidade, ita bele hari’i no reforma mentalidade konvensional porezemplo ema balun kestiona ho karakter Timor oan ne’ebé hatene debates barak, kritika barak maibe asaun oituan.

3.      Liu husi Universidade ita bele transforma ita nia hanoin ho ambiente kreatividade husi estudu relasaun internasional ne’ebé nakonu ho konseitu no karakter interdisipliner hodi implemente ba area ne’ebé presija ita nia itervensaun, asaun la’os iha folha nia leten maibe iha folha komunidade nia leten (intervensaun iha terenu)

4.      Estudante Relasaun Internasional tenki iha hanoin luan, ho karakter dinamismu, hatene no bele resolve problemas ne’ebé mosu iha komunidade nia le’et ho hanoin no espiritu ne’ebé nakonu ho karater trasformasaun.

5.      Komunidade, povu Timor-Leste la presija ema ne’ebé matenek ho valor bo’ot iha akademia, hatene lingua oi-oin, hatene uja software komputador barak,  maibe sira presija iha kreatividade dinamismu para bele reforsa sira nia matenek, konhesemnetu akademiku hodi transforma povu Timor-Leste husi nakukun, husi ki’ak no mukit.

Buat hirak mak sai papel importante núdar estudante iha disiplina relasaun internasional iha Timor-Leste, no intervensaun sira ne’e sei fo benefisiu bo’ot ba dezenvolvimentu sosial. Núdar ema Timor-oan, estudante ne’ebé nakonu ho matenek dinamismu, ne’ebé mai husi familia kia’k ida ne’e mak ita nia vokasaun hodi sai transformador ba vida ema sociedade nian.

Celso da Fonseca

Dili, 02-02-2014

Koperasaun Governu Chinez ho Timor-Leste no Investimentu iha setor Oi-oin

Koperasaun Governu Chinez ho Timor-Leste no Investimentu iha setor Oi-oin[1]

Dili, 11 de Abril 2014

Celso da Fonseca

Artikel badak ida ne’e atu hare fila fali oinsa papel governu Chinez iha Timor-Leste. Hanesan hakerek nain hasai artikel anterior kona ba relasaun Timor-Leste ho China iha blog forum relasaun internasional katak politika do governu Timor-Leste hodi kria koperasaun ho China sai objetivu strategia politika uniqu. Hare ba realidade potenisa China ho kondisaun ekonomia ne’ebé agora dadauk estrondu (booming) nune’e mos papel governu China hodi kontribui dezenvolvimentu ekonomia global sai tendensia foun ba nasaun hotu-hotu.

[2]Relasaun China ho Timor-Leste hatudu ona sinal positivu entre koperasaun bilateral nasaun rua ne’e. Buat hirak ne’e ita bele hare husi ajudus gratiuta husi governu China ba Timor-Leste iha parte infrastrutura nian hanesan Residensia Quartel F-FDTL officers, edifisiu  ministru estranjeitu, palacio do presidente, roh patroilha, quartel habiatasaun forsa nian no seluk tan.

Iha parte investimentu maioria mai husi empresariu China ne’ebé ho persentu bo’ot hala’o aktividades komersiu iha Timor-Leste, realidade radikulu ne’ebé hatudu ba ita katak nasaun barak mak sei kestiona problema stabilidade nasional no seguransa rai laran no lakoi mai halo aktividades komersiu iha Timor-Leste maibe sosiedade China iha abodajen difirente, maske presensa sira nian iha ita nia rai hamosu problema inveja sosial, ema barak mak la gosta tanba sira domina iha area komersiu hotu-hotu maibe keta haluha katak sira mos ajuda governu Timor-Leste hodi kria kampu de trabalhu ba Timor oan, ema barak mak servisu iha loja ou kompanha China nian. Ida ne’e realidade ne’ebe ita labele nega.

Relasiona ba investimentu, China iha komitmentu, mehi no ambisaun bo’ot atu kontinua nafatin halo koperasaun ekonomia ho Timor-Leste. Interese bo’ot husi China mak nesesidade iha area energia, hare ba rekursu naturais bo’ot mak agora dadauk ita dezenvolve hela, mina tasi Timor sai fator iteresante ba governu chinez, no ida ne’e sai posibilidade bo’ot ba China atu halo investimentu iha parte enerjia nian. Laos iha parte enerjia deit maibe mos iha parte seluk ne’ebé sei halao iha futuru oin mai.

Tuir artikel ne’ebé hasai iha China, Timor-Leste announce all-round cooperative partnership (http://news.xinhuanet.com/english/china/2014-04/08/c_133246344.htm) hatu du katak koperasaun entre China ho Timor-Leste sei halai ba area komérsio bilateral, investimento mutual, koperasaun iha area infra-estrutura, inter-konektividade, enerjia, agricultura no  konstrusaun iha zonas ekonómikas especiais nune’e mos iha interkambio entre ema no kultura. Iha parte balun mos sira kolia kona-ba rota da seda marítima nian.

Atu realiza mehi hirak ne’e certamentu presija fator prinsipal ne’ebé sai asuntu prioridade, fator ne’e mak stabilidade nasional. Enkontru Premeiru Minsitru Xanana Gusmao ho Presidente Republika da Popular China, Xi Jinping iha kapital China, Beijing iha dia 8 de Abril 2014 hatudu sinal positivu entre nasaun rua ne’e. Autor politika husi nasaun rua ne’e anuncia atu halo parseiru komperativa iha area ekonomia, politika no seluk tan.

Timor-Leste la duvida ho komitmentu no boa vontade husi governu Chinez atu kontinua nafatin fo ajuda iha parte dezeenvolvimentu fiziku no naun-fiziku. Hanesan iha enkontru presidente China hasoru Sr. Xanana Gusmao, China sei fo kontribusaun ba dezenvolvimentu pas iha Timor-Leste hodi suporta mehi hirak ne’ebé sai interese governu povu Chinez nian.

Husi parte Timor-Leste, tuir enkontru ne’ebé fo sai iha media, Xanana Gusmao louva inisiativa no komitmentu suporta husi China ba area dezenvolvimentu ekonomia no sosial iha Timor-Leste, liu-liu promosaun stabilidade e prosperiodade regional no mundu.

Ikus liu hakerek nain hare katak China fo ona dalan positivu ba Timor-Leste liu husi asaun politika boa vontade, ajudus, no kontribusaun ba stabilidade rai laran no rejional. Iha futuru oin mai, governu China sei halo koperasaun metin liu tan ho ita nia governu liu-liu iha setor enerjia nian. Tanba ida ne’e mos sai papel importante ba interese nasional governu China nian. Nune’e mos iha parte seluk hanesan investimentu ekonomia, industria, sei kontinua halao nafatin husi governu Chinez, no kontinua nafatin ba koperasaun zonas ekonómikas especiais, no iha posibilidade ba koperasaun area komersiu livre entre nasaun rua ne’e.

---

[1] Celso Fonseca (hakerek nain) : artikel ne’e opiniaun pribadu, refere ba artikel anterior iha blog Forum Relasaun Internasionaal, no  re-interpreta ba artikl ne’ebe fo sai iha China, Timor-Leste announce all-round cooperative partnership (http://news.xinhuanet.com/english/china/2014-04/08/c_133246344.htm).

[2] http://forum-relasaun-internasional.blogspot.com/search/label/East%20Asia

Pergunta Sobre Fragile State no Failed State

Hatan ba perguntas husi: hadas Sholy Costa

hadas Sholy Costa

hau hakarak husu ba maluk relasaun internasional sira katak situasaun mundo globalizasaun nee dala barak nasaun primeiru mundo hateten katak timor leste hanesan nasaun frazil no failado ita hare husi aspeito nebe.... no durante ita nia ministro negosio estranjeiros loby ba nasaun avansado nusa mak ita nia povu se kiak no nasaun se frazil?

Like ·  · Share · 19 hours ago

• 

  Celso da Fonseca Terminilogia Fragile State refere ba nasaun ne’ebe ho rendimentu ki’ik (low-income country) ne’ebe ho kondisaun legitimidade no kapasidade estadu ne’ebe fraku, kondisaun sosial ne’ebe vulneravel liu, dala barak akontese problemas sosial, konflitus, no krize sosial ne’ebe afeita ba estabilidade nasional. 
• 
  

  
  

  Iha interpretasaun no definisaun variadus/oi-oin, hanesan mos bele hare husi aspeitu ekonomia kresimentu ekonomia ho kondisaun pobreza, rendimentu individu ne’ebe minim liu, kurang husi $1/Dia (Un Dolar Amerikanu kada Loron ida). (Note: bele le’e tan husi referensia balun). 

  
  

  Klaru katak Timor-Leste núdar estadu foun ida ne’ebé tama iha grupo Fragile State (G7+), lu husi G7+ forum hamutuk ho nasaun frajil sira seluk. Sira sempre halo enkontru kolia kona-ba oinsa mak bele rezolve problemas ne’ebe sira infrenta no fahe esperensia ba malu, nune’e mos akumula ideias husi fragile state ba doadores internasional, agensia dezenvolvimentus internasional konaba impementasaun no intervensaun ba programa dezenvolvimentu global hanesan iha MDG no post-MDG depois 2015. 
• 
  

  
  

  Iha parte balun mos, fragile states sira bele fahe esperensia ba malu oinsa atu resolve problema sosial, konflitus, dezafius iha politika, ekonomia internal rai ida-ida nian.
• 
  

  
  

  Hare ba esforsu hirak ne’e, nasoens sira ne’e iha ambisaun, mehi atu sai husi linha fragile state. Hanesan Timor-Leste agora dadauk iha progresu diak sai husi konflitu sosial ne’ebe estabelese Peace Building ba Nation Building, kontinua ba State Building, ita hakarak oinsa para Estadu hamrik forti hodi resolve problemas sosial sira seluk.

  
  

  Relasiona ho Fragile State, dala barak iha konotasaun negativu ne’ebe implika ba nasaun foun sira ne’ebe tama iha fragile state, hanesan agra dadauk sira ne’ebe tama iha grupo G7+. Katak nasaun sira ne’e iha linha perigu atu tama Failed State, tanba sira nia estadu, kondisaun politika, akonomia sei frajil liu.

  Failed State hare husi indikator hanesan tuir mai ne’e 

  1. Presaun Demografika 

  2. Refujiadu no Deslokadu 

  3. Reklamasaun Grupo 

  4. Luta Huanu 

  5. Dezenvolvimentu iha egualidade (laiha diegualidade) 

  6. Legitimada Estadu nian 

  7. Servisu Publiku 

  8. Direitus Humanu 

  9. Aparelhu iha area Seguransa 

  10. Funcionalizasaun Elite 

  11. Intervensaun externa

  
  

  Hare indice failed state hanesan asuntu hirak ne’ebe iha leten, maijumenus 70 percentu Timor-Leste atinji ona saida mak prinsial liu, no ida ne’e hatudu indikasaun ida katak agora dadauk Timor-Leste maski sei tama iha linha Fragile States maibe hakat ona ba faze dezenvolvimentu ho progresu diak ne’ebe sai husi linha Failed State.

  Maske iha buat balun ne’ebe ita implementa ona no sei presija esforsu an atu hadia hanesan iha area seguransa, dezenvolvimentu egualidade, funsionalizasaun elit ho buat ki’ik balun, maibe en geral Timor-Leste laos nasaun failhadu (failed State).
• 
  

  
  

  Iha parte balun, ita nia liders, no sociedade civil, akademia balun totalmente rejeita ho ideias ne’ebe mai sai husi peritus politika internasional no ema konyesidu balun hanesan : Francis Fukumaya; ne’ebe famousu ho nia teze kona ba “The end of History”. Nia mos hakerek kona-ba failed state no foti ezemplo Timor-Leste ne’ebe tama iha linha ida ne’e. (favor ida le’e iha ne’ehttp://thediplomat.com/2008/06/fukuyamas-side-of-history/)

  Responde ba Fukumaya; Ramos Horta wanhira halao ni Public Lecture iha Colombia University, no Universidave avansadu balun iha Amerika no nasaun sira seluk iha tinan hirak liu ba depois krize 2006, nia sempre rejeita totalmente ideias hirak ne’e, tanba rajaun Timor-Leste iha difirensia bo’ot kompara ho nasaun sira seluk. Klaru que Timor-Leste tama iha fragile state, maibe laos dehan katak Timor-Leste nudar failed Sate hare ba progresu ne’ebe ita atinji ona bazeia ba indikator failed state iha leten.
• 
  

  
  

  Indikasaun simples atu haforsu ideias Timor-Leste ne’ebe laos tama Failed State (Estadu Failhadu) mak, agora dadauk ita nia governu independente los ona laiha intervensaun husi rai liur, ita laos iha Misaun ONU nia okos ona, ita iha poder absolutamente atu ukun ita nia nasaun.
• 
  

  
  

  Timor-Leste mos iha kapasidade atu hola parte iha diaologu internasional kona ba fahe esperensia no ideias oinsa ita hakat sai husi konflitus sosial oi-oin hanesan krize 2006 no seluk tan. Ita mos ajuda nasaun sira seluk ho orsamentu maske ki’ik maibe ita iha solidaridade internasional ajuda nasaun sira seluk hanesan Guine Bisau, no desastre natural ne’ebe akontese iha nasaun balun hanesan China, Indonesia, no nasaun vijinu sira, ita ajuda nafatin.

  
  

  Karik perguntas bo’ot ida ba ita mak hanesan ne’e: wanhira mak ita sai husi grupo Fragile State; G7+?
• 
  

  
  

  Se ita lakoi ema seluk bolu nafatin Timor-Leste iha indikasaun tama ba Failed State, entaun dalan premeiru mak ita tenki sai husi linha fragile state ne’ebe tama iha grupo G7+.

  
  

  Hau senti tenpo seluk ita bele halo diskusaun iha Universidade kona ba asuntu ida ne’e; imi prepara diak para ita halo diskusaun akademia ida.

  
  

  Thanks

  Celso da Fonseca

FAKAR OSAN BARAK; BENEFISIU BA EMA KIAK SIRA OINSA

Se osan hirak ne’e fakar ba area Edukasaun, Benefisiu saida mak ema Kiak sira hetan?

Relasiona ho debate OJE 2014 iha uma fukun Parlementu Nasional Timor-Leste foin lalais ne’e hamosu perguntas bo’ot: kuaje ita gasta ona $5, 270, 103,000,- (Sinku biloens duzentus setenta milhoens sentu I tres mil Dollar Amerikanu) husi tinan 2007-2013 (tenik Estanislao).

Iha parte balun núdar chefe de governu ba periodu V Governu Konstitusional PM Xanana Gusmao iha fulan hirak liu ba ne’ebe hasai iha website TATOLI; bele visita ou klik ba website ida ne’e http://tatoliavozdetimor.blogspot.com/2013/05/avaliasaun-progresu-dezenvolvimento.html  nia dehan katak “Lakohi Ona Fakar Osan Arbiru”.  “Primeiru Ministru (PM) Xanana Gusmao promete sei la repete tan eru Governu Aliansa Maioria Parlamentar (AMP) nian ne’ebe utiliza osan estadu latuir nia dalan”

Osan sira ne’e gasta ba saida?  portantu se  problema sosial no dezenvolvimentu estadu hanesan Nation Building no State Building  ne’ebe presija gastu orsamentu barak atu hadia asuntu hirak ne’e ita bele dehan katak la’os kestaun rasonavel liu.

Iha parte balun ita hotu hatene katak governu esforsu an atu aloka osan ba dezenvolvimentu iha area oi-oin, maibe iha kritika barak husi povu Timor-Leste nomos husi sociedade civil no akademia tanba governu fakar osan arbiru hanesan iha area Agrikultura fahe trator ba agrikultores sira maibe produsaun aihan menus no Timor-Leste depende ba importasaun fos husi rai liu,  tinan-tinan hadia estrada maibe estada sempre at, aloka orsamentu ba be'e mos maibe povu ih area Taibesi no Becora sempre halerik ba be’e, halo uma ba komunidade hanesan programa MDG-Uma Lima ho modelu Kobi-House maibe ema lakoi ba hela no hetan kritika maka'as tanba la sustentavel, iha area turismu hari’i programa miss turismu ne'ebe konsidera ladun apar ho kondisaun Timor-Leste agora, povu sei nota hela katak governu gasta ona osan barak maibe resultadu ba “ povu kiak laiha impaktu positivu”.

Maske ho laran triste povu kiak sira la husu buat barak, sira husu deit asuntu ida deit, oinsa  halo nia oan sira bele asesu ba escola.

Edukasaun sai savi principal ba dezenvolvimentu

Problema bo’ot mak oinsa atu dezenvolve setor naun-fiziku, hadia dezenvolvimentu rekursu humanu husi nivel Escola Basiku to nivel Universidade, hadia sistema edukasaun, hadia mentalidade edukador (mestre) sira, laos atu sai ema ne’ebe transfere siensia (matenek) deit, maibe presija mos kria ambiente kreativu, inspira alunus sira para sai ema ne’ebe independete, kria inovasaun foun laos depende deit ba sistema edukasaun konvensional, adopta tomak sistema edukasaun husi nasaun seluk,  maibe oinsa edukasaun sai tools (feramentus) de vida, sai rikusoin ema idadak nian, hodi nune’e ema hotu-hotu iha mehi, ambisaun, oportunidade ne’ebe hanesan atu fo kontribusaun ba dezenvolvimentu nasional Timor-Leste, hodi nune’e mehi inan aman sira bele realiza, maske sira hatene katak sira labele goza duni sira nia moris iha era ida ne’e, maibe minimal nia oan sira bele hetan oportunidade ba edukasaun.

Edukasaun nudar mata dalan ba Dezenvolvimentu Sosial, no Kombate Pobreza

Asesu ba edukasaun sai savi importante ba individu no dezenvolvimentu sosial, iha parte balun liu husi edukasaun bele eduka ema atu sai matenek, ida ne’e sai meius ida atu kombate pobreza tamba bele kapasita habilidade individu ho matenek, sai ema ne’ebe sobedoria ho siensia. Edukasaun sai hanesan osan mean ne’ebe iha valor bo’ot liu. Matenek sai rekursu ne’ebe laiha fin, lahanesan mina Timor-Leste iha prediksaun bele hotu maibe matenek  nunka mais hotu (rohan laek).

Asesu ba edukasaun laos bazeia ba status sosial tanba “ marjinalizasaun ba ema ki’ak hodi labele asesu edukasaun ou ba sira ne'ebe laiha osan hodi hetan asesu edukasaun ne’ebe ho kualidade diak.  Ita hare dala barak konseitu marjinalidade mosu tanba ita hare husi asuntu satus sosial, ida ne’e mak sai problema bo’ot no ema Timor oan luta kontra sistema diskrimnasaun hanesann ne’e.

Iha parte balun, ita bele hare katak kondisaun pobreza afeita ba asesu edukasaun tanba dala barak iha area rural familia ne’ebe moris iha kondisaun ki’ak halo inan aman sira foti desijaun liu-liu ba oan mane permeiru ou maluk feto balun atu ajuda sira nia inan aman hodi sustenta ekonomia familia. Rajaun ida ne’e ita labele fo kulpa ba inan aman sira iha area rural, dala barak peritus internasional, husi governu, peskizador balun sempre dehan tanba ne’e kestaun kultural, sira prefere haruka sira nia oan sira iha uma deit duke ba escola, ida ne’e laos rajaun forte maibe tanba iha influensia kondisaun sosial mak obriga inan aman atu foti desijaun ida ne’e.

Aprende husi era Kolonialismu: Vitima ba asesu Edukasaun 

Hanesan tenpo kolonialismu iha era Portugal nia  durante  tinan 450 nia laran, iha diskriminasaun sodial, liu-liu asesu ba edukasaun, ita hotu hatene ema bo’ot nia oan, liurai nia oan sira, ema ne’ebe iha osan mak bele asesu ba edukasaun, sira ne’ebe kiak bolu Maubere oan sira marjinalu tebes, laiha oportunidade atu asesu ba edukasaun, nune’e mos iha era Indoensia nia tenpo ema barak mak asesu ba edukasaun maibe nia implikasaun mak oinsa atu habeler Ideologia Indonesiasi ho objektivu atu Timor-oan sira bele sinti katak integrasaun ho Indoensia diak liu, iha parte balun maske edukasaun ba Timor-oan fasil, maibe ita moris iha rejime autoritarian ne’ebe dala barak fo influensia bo’ot ba sistema edukasaun ho modelu komando. iha parte balun Edukador sira ladun iha konyesementu diak oinsa atu eduka alunus sira ho sistema non-violensia, estudante barak mak sai vitima, sira deside atu sai husi escola tanba mestre sira dala barak uja metodologia hanesan tenpo Portugues nian ne’ebe obriga ou uja  violensia (baku, intimida) alunus sira.

Dadus Estatiska Asesu ba Edukasaun iha Timor-Leste

Maske ita hare estatiska husi Relatoriu Millenium Development Goal t hatudu katak, agora dadauk labarik barak iha Timor-Leste bele asesu ona ba edukasaun iha nivel Primaria no bele akaba sira nia escola ho 80 persentu, kompara ho tinan hirak liu ba porezemplo iha tinan 2002 maijumenus 50 percent deit mak bele akaba eskola.

Ema bo’ot sira iha institusaun governu bele gaba sira nia-an ho progresu nebe ita hetan, katak Timor-Leste nasaun foun, nasaun kiak maibe bele duni dezenvolve area edukasaun tanba labarik barak mak bele asesu ba edukasaun kompara ho nasaun bara-barak iha Afirka no nasaun kiak balun iha mundu. Ida ne’e dala barak atu motiva ita deit, katak ita mos bele maibe iha parte balun taka ita nia matan, hasae ita nia egoismu, arogansia deit ba realidade vazia, laiha kointidu konstruktivu. Iha lian Indonesia ema bolu “ASBUN” (Asal Bunyi) deit.

 Saida mak ita presija hadia iha area Edukasaun?

“Ema hotu hatene katak edukasaun sai savi importante ba individu no dezenvolvimentu sosial, edukasaun sai rekursu bo’ot ne’ebe nunka hotu, edukasaun iha valor bo’ot (hanesan osan mean).  Liu husi edukasaun bele kapasita habilidade individu ho matenek no sai ema ne’ebe sobedo.”

Ho rajaun ida ne’e, saida mak ita hadia, simplesmente la presija hanoin barak ita bele dehan katak “hasae deit ou fakar osan lubuk balun ba area edukasaun”. Importante liu mak hadia jestaun orsamentu ba area edukasaun, hasae kualidade edukasaun liu husi sistema edukasaun ne’ebe kondusivel, responde nesedidade Timor-oan nian no tenki iha planu asaun futuristiku ne’ebe pragmatis, sistema edukasaun labele statis maibe tenki dinamis.

Iha area edukasaun primaria, presekundaria no sekundaria, governu tenki iha planu no vijaun klean labele iha ambisaun oinsa para atrai alunus barak, targetu aula escola nakunu, maibe oinsa para hadia gestaun sistema edukasaun hanesan fromasaun ba mestre sira laos iha area lingua Portugues deit, maibe mos dezenvolve lingua Tetum nudar lingua Nasional. Relasuona ho lingua, realidade mestre barak mak difisil uja lingua Portuges, no sira iha obrigatoriu para aprende Portugues. Iha parte balun, tenki mos hadia formasaun ba metodologia hanorin, aumenta konhesementu ne’ebe bele apar ho konteksu global, liu-liu oinsa atu reintreperta ou dezenvolve sistema edukasaun ne’ebe refleta ba valor sosial no bele responde kondisaun global.

Governu mos tenki iha planu oinsa depois alunus sira akaba escola iha area secundariu no kontinua ba nivel universidade. Iha Timor-Leste uniku universidade nacional ida deit UNTL (Universidade Nacional Timor Leste), sera que alunus sira kuandu akaba escola iha secundaria, UNTL bele akumula sira hotu galae? Sa lae opsaun ikus mak tenki tama Universidade pribadu, Universidade hirak ne’e ida-idak iha regulamentu internal liu-liu ba orsamentu selu escola. Balun selu karun, balun ladun karun maibe ida ne’e iha influensia mos ba kualidade edukasaun, tanba Universidade mos presija selu dosente sira ne’ebe ho kualidade diak, entaun presija orsamentu, rekursu orsamentu mak mai husi alunus sira ne’ebe selu escola. Ida ne’e sai problema ba ema ki’ak sira nia oan ho rendimentu $US 1 (un dolar Amerikanu) loron ida.

Iha parte balun problema ne’ebe mosu iha universdiade pribada (swasta) mak relasiona ho mestre sira, dala barak mestre, dosente sira infrenta problema lingua, Portugues nudar lingua obrigatoriu ne’ebe tenki uja hodi hanorin iha universidade. Na realidade dosente sira barak mak sei uja lingua Indonesia, ou Ingles duke uja lingua Portugues hodi hanorin,  alternativa ikus mak uja lingua Tetum tanba ida ne’e nudar lingua nasional Timor-Leste. Maibe Tetum seidauk dezenvolve ho diak, tanba ne’e agora dadauk lingua Tetum ne’ebe uja sei sai kahur malu ho lingua seluk, e dala barak susar atu transfere sciencia husi lingua seluk ba Tetum. Ho rajaun ida ne’e, governu tenki iha planu estrategiku ida ne’ebe bele responde problemas hirak ne’e. Presija mos dezenvolve lingua Tetum, labele fakar osan hodi dezenvolve lingua Portugues deit.

Iha area Universidade, hanesan hakerek nain hato’o iha pagina leten katak estudante sira tenki hatene papel importante ne’ebe sira presija kumpri, tanba realidade iha Universidade dala barak alunus sira seidauk iha espiritu kreativismu, kria inovasaun foun, independente, hakarak aprende buat foun laos kopia ou adopta husi rai seluk. Hanoin hirak ne’e nia indikasaun mak dala barak alunus sira seidauk komprende diak metodu kreativu ne’ebe implementa iha vida akademia, liu-liu iha area hakerek artikel, opiniaun, tesis, peskija no seluk tan.

Governu tenki fakar mos osan oituan hodi hadia no dezenvolve Metodologia hakerek iha area peskija nian, governu tenki aloka osan ba  institusaun ou agensia ne’ebe bele kontrola kualidade hakerek ho programa Anti-Plagiarismu hodi nune'e bele proteje no perserve kultura propriedade intelektual (Intellectual Property) iha vida akademia, oinsa atu prevene  sistema (Copy-Paste) ne'ebe alunus barak sei adopta ema seluk nia ideias deit la tau rekonhesementu ba hakerek nain sira seluk. Hau fiar katak se governu fakar oituan osan ba area hirak ne’ebe mensiona iha leten, espiritu no ambiente kreativismu sei buras iha rai doben Timor-Leste duke hein deit ou adopta husi ema seluk nia ideias.

Hakerek Nain: Celso da Fonseca

Opiniaun ne’e refleta husi ideia Pribadi: núdar reflesaun ida ba resolusaun iha Tinan foun 2014 iha area edukasaun relasiona ba debate  OJE 2014  ho isu “fakar osan barak”  iha Parlementu Nasional Timor-Leste foin lalais ne'e.